Asal Penatai Ajat Nitih ke kenang leka ensera enggau sebut leka tusut, main ngajat tu keterubah iya dipelajar ka bansa Iban ari Petara siko ti benama Ulup Baru Lichin, Bujang Ilang Lengain. Tang cherita ti nyentok agi enda ulih dipansik laban orang ke tuai ti ditampong enda ulih madah enggau nyemetak. Orang Ti Ngajat Nyadi urang ti ngajat, enda milih indu tauka lelaki, tuai tauka biak. Apin mantai ke bungai ajat, dulu sida nyembah meri basa ke urang ti ngemata. Udah nya baru sida ngator singkang nitih ke rentak taboh. Entepa kiba peling kanan. Chundong baka ke ka rebah. Bediri baka ke tejingkau ke sadau. Meremi baka ke terengkah ba tikai. Jari dikepai, kaki disingkang. Ama surut, ama mansang. Nerais sereta engkechit. Merejok sereta manjong. Terabai dijapai lalu dipegai. Ilang disintak lalu dibiau. Lesong dipanggum jari dikitau. Pala gilik-gilik. Buah isi getik-getik. Mata kaliq-kaliq. Nya meh sekeda bungai ajat. Suah urang ngajat siko-siko sekali angkat lalu suah mega urang ngajat beraban bebala maioh. Tang taja baka nya, urang ti tampak agi kening suah agi ditarit urang diasoh ngajat "beranchau tikai" dulu agi ari urang bukai, iya nya urang ti suah agi pegi bejalai ngagai menua bukai lalu bisi didinga berita udah kala ampit enggau orang betarak ngajat sekumbang iya diau di menua orang. Tuboh sida suah penoh laban ukir tauka kelingai ti ngenjing begenarau baka likau ukir sawa ari pegu nyentok ke gerempong tapa kaki tauka jari. Agi menya ukir nya tanda sida nakal nat ke pemedis, lalu ukir ba tunjok jari ti dikumbai "Tegulun" nya mandang ka sida udah kala bedengah munsoh. Ajat sida ke indu, lemi agi ari gaya. Sida enda engkechit, enda merejok. Enda ngena ilang. Enda ngena terabai. Enda manggum lesong. Tang pengelembut sida ngajat, lingguk punggung enggau kepai jari sida, sema jako, tau ngasoh sida ke lelaki enda tesintak ke seput, enda enkesap mata. Bansa Ajat Ngajat bepelasar ka gerak langkah sereta enggau tuju ngajat lalu tau dibagi ngagai lima bengkah:- Ajat Bunuh Dimain ka pungka lelaki Iban ti beberita landik ngajat, sikar, landik bekuntau tauka udah kala enggau urang ngayau tauka bedengah munsoh. Ajat tu tau dibagi ngagai tiga bansa; Pencha, Kuntau enggau Tembong. Ajat tu endang tulin geraklangkah ajat lelaki ti diumba enggau rentak taboh ti jampat setipak enggau penyampat jari urang ti ngajat ti ngenjing betabu-tabu nguji nyilat tumbok munsuh ti diperagam benong ngelaban iya. Leboh ngajat, kadang-kadang pengajat ngena ngepan penuh, mai terabai ti diukir bechanagir buah "Gerasi", sereta ilang ti rimbun bejejabong bok munsoh. Ajat Semain Dimain sida ke biak dikena merindang lemai, leboh nyambut temuai, tauka dikena leboh bepekit ka pengelandik ngajat. Ajat tu dimain ngena langkah ti liut-lembut diumba enggau taboh "anyut ai". Leboh ngajat. kepai jari enggau tuboh sereta singkang kaki pengajat berupai bendar lembut, ngenjing giau-giau enda salah-salah baka daun nyiur ditiup angin begadai-gadai. Ajat Iring Dimain sida ke biak dikena ngiring temuai, raban urang ti ngambi indu, bala pengabang, pemesai tauka dikena ngelalu ka Petara bejalai niti rumah leboh Iban bisi begawai. Ajat tu mega suah disebut Ajat Titi Ruai. Rentak taboh ti dikena ba ajat tu sama enggau rentak taboh Ajat Semain. Ajat Nanggung Lesong Dimain pungka lelaki ti gagah nangong lesong ngena penguat rang enggau ngeli. Ajat tu nyau deka sama enggau pengelubah ajat Semain lalu utai ti mida ajat tu ari bansa ajat bukai iya nya laban ajat tu beguna ke lesong. Ajat tu nunjuk ke pengering pengajat manggum lesung ngena ngeli iya sereta ngengkah belubah-lubah lesong nya tadi ba tempat asal, sambil ngepai ke jari sereta ngentak ke kaki nitih ke rentak taboh. Ajat Kelulo Dimain urang ke bungah leboh bebuti dikena nembu ka gawai ti alai sida ngelulu ke ulah pangan diri, ti dikenatai ngena pengelandik geraklangkah leboh ngajat. Ba ajat tu, pengajat enda tentu peduli ka pemanah rentak taboh, lalu enda mega beguna ke ngepan ti penuh. Utai ti pemadu beguna iya nya pengelandik enggau pemungah ngelulu ka ulah pangan diri sambil nitih ke rentak taboh. Ambi ke banding, sida ke indu suah ngajat ngelulu ka ulah lelaki ke buyan lari ke jelu maia ngasu. Sida ke lelaki suah ngajat ngelulu ke sida ke indu ti ngelusu nutok, nyumai tauka ulah indu beribun ka anak sida. Geraklangkah sida ke ngajat endang digaga dikelulu kena ngasoh urang ketawa. Kelimpah ari lima batang ajat ti udah dikenang nya, agi mega bisi bansa ajat bukai ti mit-mit sereta nyau nadai tentu dikingat ka agi baka Ajat Pama, Ajat Kera, Ajat Gerasi Tunsang, Ajat Tempurong enggau Ajat Turun Tupai. Semua bansa ajat nya tadi, dimain ngena taboh ke lubah laban iya nyau deka sebaka enggau gaia Ajat Kelulo. Rentak Taboh Nyadi penyampau tuboh orang ti nebah taboh dikena ngajat bisi empat iko. Siko ari sida nempap Gendang tauka dedumbak, siko naboh Tawak, siko naboh Bebendai lalu siko naboh Engkerumong. Leboh betaboh, iya ti naboh Bebendai belaboh dulo laban dikena nentu ke penyampat rentak taboh, ditimbal Gendang, ditangkan enggau Tawak lalu dientudi ke Engkerumong. Ari dinga pending orang ti enda teleba, rentak taboh dikena ngajat munyi ti dua bansa aja, iya nya rentak lubah enggau rentak jampat. Iya ke bendar, taboh ngajat bisi maioh bengkah baka Ayun Lundai, Ai Anyut, Sinu Ngenang enggau Tanjak Ai. Taboh tiga bansa ti keterubah nya lubah rentak lalu suah dikena Ajat Semain, Ajat Iring enggau Ajat Kelulu. Rentak taboh Tanjak Ai tu jampat lalu dikena ba Ajat Bunuh. Bisi mega rentak taboh bukai ti enda besangkut-paut enggau ngajat baka rentak tinggang punggung ti ditaboh maia ngambi indu enggau rentak tabuh rayah dikena ngerandang jalai. Ngepan Dikena Ngajat Ba senentang pengawa ngajat ti betuju dikena merindang ati temuai, leboh bepekit, leboh ngalu Petara tauka leboh pengawa melah pinang, pendiau orang ke ngajat berupai bisi penimpang enti iya enda ngena ngepan asal Iban ti chukup. Nyadi sekeda ari ngepan nya baka tu :- Orang lelaki ngena sirat panjai. Suah bechura mirah. Tauka bebungai-bungai lalu bepaya ka kain ti disungkit. Iko sirat dikelapong ngena gerunong puru ti manah bendar munyi leboh engkechit sereta ngentak ke kaki sambil nyintak duku ilang ke ditangkin. Pala ditangkup ke ketapu rutan ti diujak ke lelanjang bulu ruai, langgai tajai tauka bulu kenyalang. Bebaju kebat dikumbai Baju Burong ti beukir maioh leman. Dada disengkabong ngena gagong kulit remaong raras tauka beruang rambai. Rekong dikungkong marik rantai. Berang dipasok simpai pirak tauka simpai tapang. Ilang ti ditangkin bejejabong ka bok munsoh ke begelong bauh ngelegetang. Terabai ti dipegai bekenarau penoh ukir. Betis dipasok enggau engkerimok ti digaga ari pirak sereta diselat ngena unus ti digaga ari runut aping pengerang. Sida ke indu ngena kain sungkit ti ditating enggau ringgit pirak. Punggong dikungkong rawai rinyai nungkat ka kerigai rusok marang, dililit ngena lampit pirak. Dada dibap ngena selampai ti diburai enggau leka marik bekengkang. Pending disumping ngena antin mas. Pala diujak ke sugu tinggi. Dekuan nyeritan dikungkong gelang. Buko aliq dikungkong ngena gerunchong temaga tauka pirak. Tuju Ngajat Nyau ka ba tiap-tiap pengerami kitai Iban, pengawa ngajat endang enda kala tinggal. Agi kelia, kelimpah ari dikena merindang ati, mandang ke penyikar bekuntau bepancha, bebuti maia melah pinang enggau ngelalu ke temuai, ngajat tu mega dikena merindang semengat padi tauka dikena bebasa ke iya. Nitih ke pengarap kitai Iban kelia, enti kitai siru ngintu padi, dia antu padi deka begulai enggau kitai lalu ngujong ke kitai bulih padi. Leboh Gawai Batu, Raja Simpulang Gana, dikangau ngena leka pengap enggau sampi. Lalu leboh iya datai, iya dialu ngena piring sereta main asal baka ngajat. Bakanya mega enti bisi temuai. Iya disambut ngena basa. Leboh lemai ari, iya diperindang ngena ajat. Simpul Kenang Semua bansa bisi ngembuan, nyimpan sereta mandang ke main asal diri. Kelimpah ari nunjuk ke pengeraja bansa nya ba main asal, iya mega ulih nyerakop ke bansa nya laban sida bisi ngembuan sereta bepenemu ba main ti sama. Nya alai, ngajat sereta main asal ke bukai patut bendar dipelajar sereta dikembuan bansa kitai Iban dikena kitai ngelaiq bansa diri, dikena kitai mandang ke pengeraja main asal kitai sereta dikena kitai berakup. Leboh ke belajar ngajat, kitai mega belajar ka jalai basa enggau jalai ngemas diri ba mua urang maioh. Main asal tu mega tau narit ati urang nemuai ngagai menua kitai ti tau mai penatai pemisi.
